Rwy’n artist serameg wedi’i leoli yn Brighton. Cefais BA (Anrh) mewn Dylunio a Chrefft 3D gan Brifysgol Brighton yn 2015, ac yn dilyn hyn es i i’r Coleg Celf Frenhinol i astudio MA mewn Serameg a Gwydr, lle graddiais yn 2017.
Yn 2017 enillais wobr FRESH yn y British Ceramic Biennial, a sefydlodd gyfnod preswyl i mi yn y Ganolfan Ymchwil Serameg Ryngwladol yn Nenmarc. Eleni, rwy’n un o’r gwneuthurwyr a ddewiswyd ar gyfer rhaglen Hothouse gan y Cyngor Crefftau.
Yn fy ymarfer, rwy’n dathlu’r dull cynhanesyddol o dorchi, sydd wedi’i wreiddio’n ddwfn yn hanes crefft a serameg ac sy’n dal i chwarae rhan hanfodol mewn creu gwaith cyfoes. Rwy’n dewis defnyddio’r dull hwn gan ddatgelu’r coiliau a datguddio’r broses sy’n aml yn cael ei chuddio yn y mwyafrif o weithiau serameg.
Rwy’n defnyddio’r coil fel dull lluniadu, trwy gyfatebiaeth i sut mae dylunwyr yn defnyddio pensil. Rwy’n hoffi meddwl fy mod yn ‘mynd â choil am dro’, mynegiad rydw i wedi ei fenthyg o ddywediad Paul Klee: ‘mae lluniadu yn cymryd llinell am dro’. Pan fyddaf yn gwneud darn o waith, rydw i’n gwybod lle rydw i am ddechrau ac mae gen i syniad tybiannol o sut y byddwn i eisiau iddo edrych. Yn aml, mae’r gwaith yn mynd â mi ar daith faterol a naratif ac wrth imi symud ymlaen rwy’n gwneud penderfyniadau i lunio’r ffurf derfynol yn wahanol i’r un oedd gen i mewn golwg. Rwy’n gadael i’r siâp fod, ac rwy’n gadael i serendipedd ddigwydd wrth chwilio am gymhlethdod strwythurol newydd.
Mewn byd sy’n cael ei ddigideiddio, rwyf wedi creu perthynas â chlai lle mae fy nwylo’n gweithredu fel argraffydd 3D analog ac o ganlyniad mae fy ngherfluniau’n adleisio esthetig y dechnoleg hon.
