Ganwyd Magdalene Odundo yn Nairobi, Kenya a’i haddysgu yn Kenya ac India. Gan ddod i Brydain ym 1971, astudiodd yn Surrey ac yn y Coleg Celf Frenhinol.
Mae hi wedi teithio ledled Ewrop, America ac Affrica, gan dynnu ar ffynonellau mor amrywiol â chrochenwaith New Mexico, celf corff Canolbarth Affrica, a ffurfiau cerflunwaith Groegaidd cynnar. Mae parch mawr i’w gwaith ac fe’i cynrychiolir mewn casgliadau cenedlaethol a phreifat mawr gan gynnwys y Sefydliad Celf, Chicago, yr Amgueddfa Brydeinig, yr Ashmolean ac Amgueddfa Victoria ac Albert.
Mae gwaith Odundo wedi’i adeiladu â llaw, gan ddefnyddio techneg torchi. Mae pob darn wedi’i bwrneisio, wedi’i orchuddio â slip, ac yna ei fwrneisio eto. Mae’r darnau’n cael eu tanio mewn awyrgylch ocsideiddiol, sy’n eu troi’n oren-goch. Mae ail daniad mewn awyrgylch sy’n brin o ocsigen neu ‘reduction’ yn achosi i’r clai droi’n ddu. Trafodir a yw ei gwaith yn dangos tystiolaeth o’i gwreiddiau yn Affrica neu a yw o gymeriad rhyngwladol.
Dyfarnwyd Gwobr Cydnabod Celf Affrica i Odundo gan Sefydliad y Celfyddydau Detroit yn 2008, a gwobr Cyflawniad Eithriadol yn y Celfyddydau Treftadaeth Affrica yn 2012, ynghyd â doethuriaethau anrhydeddus gan Brifysgol Florida (2014) a Phrifysgol y Celfyddydau Llundain (2016). Fe’i penodwyd yn Swyddog Urdd yr Ymerodraeth Brydeinig (OBE) am ei wasanaethau i Gelf yn 2008. Daeth yn Ganghellor Prifysgol y Celfyddydau Creadigol ym mis Mehefin 2018.
Mae arddangosfa fawr o’i gwaith: Magdalene Odundo: The Journey of Things bellach yn cael ei dangos yn Y Hepworth Wakefield, DU. Mae hwn yn cynnwys dros 50 o botiau Odundo yn cael eu harddangos, ochr yn ochr â detholiad mawr o wrthrychau hanesyddol a chyfoes sydd wedi dylanwadu arni – gan gynnwys rhai darnau a fenthycwyd o Gasgliad Serameg Prifysgol Aberystwyth.
